Çiqas ke sernustîs de şaşitîye vajîna, hen niyo. Roştber û rojnamevanê tirkî nî rozan de vanê: dewlete tarve da PKK ro mîyane sikito û wasto asma nîsane de mesela kurdî endî ebi qesey kerdene halbikero. Hama na raye zî ondêr mesela MÎT, polîs û savci vejiya.
Halla halla!
Vatena mi awa ke mordemêke niya qesey kenê, tam propaganda hukumatî kenê.
Hukumatê nînan tever ra însanî kurdî nêverdayî, her roz bi desan û seyan keno hepis.
Çi xerîb ke nî mêrîkî onca halkerdena mesela ra qesey kenê.
Bi kistene sima na mesela halkenê?
Bi zerre guretene sima na mesela halkenê?
Ebi na tore sima mesela halkenê?
Haştiya sima bin na tore yena?
Mezgê xo dêlmast çerexîno.
Demê weçînîtîs de Recep Tayyip Erdoğan vatenê ‘eke ez biyenê, mi Ocalan estenê ra dare.’
O dem nî roştberan û rojnamevanan vatenê ‘nika waxtê weçînîtîs yo coka hen vano. Na dem ra dime Erdoğan mesela halkeno. Yanê heqanê kurdan dano ci.’
Ewro roza ke ma restîme ci, her çî tenena têwertekewto. Werte miz û duman o.
Hama onca zî tayîne na hukumatî ra omidê xo nêbirno.
Na yena çi mane?
Manê xo na wo ke, nî mordemî resmê hukumatî rind nêvînenê, ya zî ebi zonayîs hukumatî rê poştî danê. Niya wazenê kurdan xayîs kerê û tertelan devam bikerê. Zovîna manê xo çîn o.
Her dem çîye kenê mane. Reye Ergenekon a, reye weçînîtîs o, nika zî mesela MÎT, polîs û savci ya.
Eregenekon de kurdan ser qesey nêbeno. Erdoğan hora vano ‘mesela kurdî çîn a, hora mesela taye kurdan esta.’
Nî carîye hukumatî naye sero nêvindenê. Reye era vîr nêanê, kamî se vato û se kerdo.
Onca pê kurdan xapnenê.
Nika nêbeno, meste beno, meste nêbeno, bêro beno!
Hukumatî na mesela rojdemê xora veta esta, roştberî û rojnamevanî nêwazenê naye bivînê.
Hukumatê xo goynenê vanê ‘mîyanê rêxistine sikito, nika mesela MÎT ke nêbiyenê, hukumatî dest estenê mesela kurdî.’
Ma sima 1925 de mîyanê ma nêsikit, ma tertele nêkerdîme.
Mesela hal biye?
Ma sima 38 de miyanê ma nêsikit, ma tertele nêkerdîme.
Mesela hal biye?
Nî zurûpolê sima, dêkûdolavê sima endî eskera yê.
Haştiye ebi kistene û tertelo siyasî nêbenê.
Keyke sima tertelu ra texelayî, haştiye o waxt yena.
Simarê zî marê zî.

KAMER SÖYLEMEZ  

56
YENİ ÖZGÜR POLİTİKA